అవును, అవినీతి బ్రహ్మరాక్షసే.   రాయటానికి నాలుగు అక్షరాల మాటే కానీ దాన్ని నిర్వచించాలంటే ఎన్ని మాటలూ  సరిపోవు. సుమారుగా అన్ని చెడు పనుల మూలల్లో అవినీతే ముఖ్య కారణంగా కనబడుతుంది, కొంతమందేమో చురుగ్గా పాల్గొంటారు, మరికొంతమందేమో అంటీముట్టనట్లుగా.  అవినీతి రూపురేఖలూ పరిపరి విధాలుగా ఉంటాయి. ఏదీ  ఏమైనా

 బ్రహ్మరాక్షసి కాబట్టే ఎన్నో వందల, వేల ఏళ్లనుండి మనని అన్ని రంగాల్లో విజయం సాధించకుండా  పీడిస్తోంది. కొంత ఎక్కువగానో, లేక కొంత తక్కువగానైనా అవినీతి లేని సమాజమూ లేదు, దేశామూ లేదనే విషయం అందరికీ తెలిసినదే. దాని  మూలలు వెతకాలంటే మనిషి పుట్టుక దాకా వెళ్లాలేమోకూడా. ఏదైనా జబ్బొస్తే స్వయంగా బాధ పడతాం. కోలుకుంటాం, లేకుంటే ఎగిరిపోతాం. కానీ ఇదెక్కడి అంటువ్యాధి? ప్లేగు, కోవిడ్ల కంటే భయంకరంగా మానవ సమాజాన్ని నిరంతరం పట్టి పీడిస్తోనేవుంది. నిర్వీర్యం చేస్తోంది. క్యాన్సర్కే మందులోచ్చాయంటున్నారు, దీనికి అంతమే లేదా?

               మాములుగా, మనిషికి, జంతువుకు తారతమ్యం ఏమిటంటే భావప్రకటనా సామర్థ్యం అంటారు. ఇంకో కోణంలో చూస్తే, ఎన్ని యుగాలైనా జంతువులేప్పుడూ (చి న్న క్రిమినుండి పెద్ద జంతువు వరకూ) ఆహార సముపార్జనకు శ్రమపడటం, కొంత సేద తీరి మళ్ళీ అదే పనిలో పడటం. ఏమీ మార్పు లేదు, ఉండదు. కానీ ఉత్కృష్ఠుడని చెప్పబడుతున్న ఈ మనిషి మాత్రం  జంతువులనుండి వేరుగా గుర్తింపబడేది నిజానికి ఇక్కడే. తనూ, తన సంబoధీ కులనుకునేవాళ్ళూ తొందర తొందరగా ఆస్తులూ అంతస్థులూ మూటగట్టుకొని, శ్రమపడకుండా నిరంతరం సుఖజీవన రాగం పాడుకుంటూ జీవించాలనే  అత్యాశతో(కంఫర్ట్ జోన్లో ఉండాలని)  అవినీతి వైపు మళ్లుతున్నాడు. ఆ ప్రయత్నంలో తన దురాలోచన ఎటు దారితీస్తోందో గ్రహించక/పట్టించుకోక కష్టాల ఊబిలో  కూరుకుపోతున్నాడు. అవినీతి పుట్టిందీ ఆ అత్యాశ నుండే. అన్ని జాడ్యాలకీ మందులు కనుక్కుంటున్నా,  ఆకాశానికి నిచ్చనలువేస్తున్నా,  అభివృద్ధి నా కనుసైగల్తో జరుగుతొందని ఢoకా కొట్టుకొనే మనిషి ఈ అవినీతి జాడ్యాన్నoదుకే పెంచి పోషిస్తున్నాడు.  సర్వాoతర్యామి అని చెప్పబడే భగవంతుడేమోగానీ, అవినీతి మాత్రం ఎందెందు వెదికిన, అందందే కలదoటంలో ఏ సందేహం వలదు. ఒక పక్క అభివృద్ధి జరుగుచున్నా, మనం ఎక్కడవేసిన గొంగళి అక్కడే రీతిన ఉన్నామన్నా, శ్లేష్మలో పడ్డ ఈగలా కొట్టుకుంటూ ఉన్నామన్నా అవినీతే ముఖ్య  కారణం. సర్వరోగనివారుణులు అనబడేవి ఎంత పని చేస్తాయోగాని, అవినీతి మాత్రం సర్వ అనర్థాలకు మూలకారణమే. బయటకు భీకరంగా కనబడే ప్రయత్నం ఎంత చేసినా ఎంతమంది అవినీతిపరులు మానసికంగా, శారీరకంగా ఆరోగ్యంగా వున్నారనేది  అనుమానాస్పదమే. వాళ్ళే కాదు, వాళ్ళ సంబంధీకులూ భయపడుతూనే వుంటారు. కానీ, ఎందుకు వదిలిపెట్టరంటే ఒక్కటే కారణం, అవినీతీ ఒక భయకరమైన వ్యసనమవటమే. “మీలో నేరం చేయనివారే ముందుగా రాయి విసరాలి” అనగానే సినిమాలో లాగా ఎవరికివారు నిజ జీవితంలోనూ అందరూ తమని తప్పుపట్టక ఊరుకుంటారనే ఒక పిచ్చి భ్రమలో వుంటారు. కానీ అన్ని రోజులూ మనవికావుగదా!

              మరి, అవినీతి ఇంత ప్రమాదకరమైన జాడ్యo అయితే  మనం ఎన్నోరంగాల్లో అద్భుతమైన ప్రగతి సాధించామన్నది కల్లిబొల్లి మాట, మసీపూసిన మారేడుకా యేనా? కాక, అది నిజంగా అత్యంత ప్రమాదకారే,  ప్రగతి నిరోధక శక్తే, దాన్ని సమూలంగా మట్టుబెట్టకపోతే సర్వనాశనమే. ఈ రెంటిలో ఏదీ నిజం అనేదే నేడు  మన ముందున్న అతి ముఖ్య ప్రశ్న. ఒక్క మాటలో చెప్పాలంటే

 రెండూ నిజాలే. ఎప్పుడూ అన్నిటినీ అoదరికీ ఆపాదించకూడదు. మానవ ప్రగతిని కాంక్షించేవారు, దానికి నిర్వీరామ కృషి చేసే వారూ ఎప్పుడూ వుంటారు. కానీ వారు కూడా వాళ్ళ ధోరణిలో వాళ్ళేవుంటే ఎలా? వాళ్ళచుట్టూనే ప్రగతి నిరోధకులూ, అవకాశావాదులూ, అసాంఘిక శక్తులూ తిష్ట వేసుకునే వుంటారు. కంచే చేను మేసినట్లుగా అవినీతిని అరికట్టటానికి నియమించబడ్డవాళ్ళలోనే అవినీతిని ప్రోత్సహించేవాళ్ళూ ఉంటారు. ప్రతి క్షణం అంతర్గత భావొద్వేగాలను గమనించి సరిఅయిన చర్యలు తీసుకుంటూనే ఉండాలి. రైతులు కష్టపడి పండించేది పంటలు వరదలపాలు చేయటానికి కాదు. ప్రభుత్వంవారు  బ్రిడ్జీలు, డ్యాములు కట్టేది, రైళ్ళు నడిపేది బాoబులు పెట్టి కూలగొట్టటానికి కాదుగదా?  మన దేశంలో అధిక జనాభా, నిరుద్యోగం   కారణాన దారిద్ర్యం విలయ తాండవం చేస్తూనే వుంది. దాన్ని అరికట్టకుంటే ఎంత ప్రగతి సాధించిన వృధానే. అయినా, దేశ వైశాల్యం, భౌగోళిక పరిస్థితులకు తగ్గట్లు ఇంత అటవీ సంపద  ఉండాలన్నట్లుగానే జనాభా, జన సాoద్రతా దేశానిబట్టే ఉండాలిగా? ఆ  సమతుల్యత లోపించినప్పుడు సహజంగానే దేశ సర్వతోముఖాభివృద్ధికి  ఆస్కారముండకపోవటమేకాక నైతిక విలువలు పడిపోయి అవినీతే రాజ్యమేలుతోo ది.

            ఎప్పటికైనా ఒక్కటే జవాబు, మన ప్రభుత్వాలు, ప్రచారసాధనాలూ అవినీతి దుష్ఫలితాలు, పాల్బడేవారిపై తీసుకునే కఠిన చర్యలపై విస్తృత ప్రచారం చేయటం, కోర్టుల్లో  తత్సంబంధ కేసులు అత్యంత వేగంగా పరిష్కరించటం జరిగితే  ఎంతో అవినీతి తగ్గే అవకాశముంది. కోవిడ్ అయినా ఒకటే, అవినీతి అయినా ఒకటే. ప్రజను తీవ్రంగా హెచ్చరించాల్సినప్పుడు కూడా అలసత్వం చూపితే ఇక ప్రభుత్వాలెందుకు,  పాలనకు అర్థమేముంది? ఎన్నో దేశాలు దీక్షపూని అవినీతిని నిర్మూలించబట్టే,  వైశాల్యంలో చిన్నవైనా అభివృద్ధిచెందిన దేశాలుగా గుర్తింపుపోందాయి.

             ప్రజలుగా మనమందరమూ చేయాల్సిన మొట్ట మొదటి పని, మనను అన్ని రకాలుగా నిర్వీర్యులను చేస్తున్న అవినీతిని కనీసం అసహ్యించుకుందాం. తాత్కాలిక లాభాలకై మనని దారుణంగా దిగజారుస్తున్న అనైతిక వ్యామోహాలకు, ప్రలోభాలకూ అతీతులుగా ఉండే ప్రయత్నం చేద్దాం. జరిగేదికాదు, అన్నీ నడుస్తయి, మడిగట్టుకొని కూర్చుంటే కూడు గూడు కాదు, నీళ్ళకూ కరువే అనే శుష్కవాదాలనను పరిత్యజించుదాం. పశు పక్షాదులకైనా, మానవ జాతికైనా శ్రమైకజీవనమే ఎల్లవేళలా ఆనందదాయకం అనే మూల సూత్రాన్ని గ్రహించి ఫలితం కంటే ప్రయత్నాన్ని ఆస్వాదిద్దాం. మనమెప్పటికీ ఇంటిపోషణలో ఎగరటం మర్చిపోయిన రామచిలుక కావద్దు. కొంచెం నిషితంగా పరిశీలిస్తే  ఇప్పటికీ, ఎప్పటికీ అవినీతికి పాల్పడకుండా  తోటివారికి సహాయంగావుండేవారికి సమాజంలో ఎనలేని గౌరవo ఇవ్వటం చూస్తోనేవుంటాం. అదే,  ఏదైనా సందర్భంలో మన అవినీతి బయల్పడితే మనతోబాటు దాంట్లో పాలుపంచుకున్నవాళ్లు, సంబంధలేనివాళ్ళు బలి అవుతారుగా. కనీసం ఆ భయానికైనా మన కుటుంబీకులైనా, సంబంధీకులెవరైనా అవినీతివైపు మొగ్గితే వారు దాంట్లోంచి బయటపడేదాకా వదిలిపెట్టొద్దు. ఎన్నో అరాచకాలు చేసి కట్టుకున్న మూటలు క్షళ్ళముందే ఎగిరిపోతుంటే, గుండెలు పగిలి అవమాన భారంతో క్రుంగిపోతున్న ఎన్నో కుటుంబాలను నిత్యం చూస్తోకూడా నాకెందుకులే/ నేనైతే ఇరుక్కొను అనుకుంటే ఎలా?వాల్మీకి అనే బోయవాడు మహర్షి అయ్యాడన్నా ఇంట్లోవాళ్ళ ప్రతిఘటనే గదా కారణo. అవినీతి కారుచిచ్చులా సర్వ వ్యవస్థలనూ దహహిస్తుoటే, ప్రజలూ మిగలరు, పాలకులూ మిగలరు. ఒక్కసారి ఆశాoతి, అరాచకత్వం ప్రబలాయంటే సర్వo నాశనమే.

               మంచి మార్పూ ఒక విప్లవం లాంటిదే. ఒక్కసారి ప్రబలిందంటే ఆగదు. మనం చేయాల్సిందల్లా సమిధనోక్కటి అహుతివ్వడమే.  గాంధీ మహాత్ముడు కలలుగన్న అవినీతిరహిత భారతాన్ని చూడడానికి సిద్ధంగా ఉందాం.

జి. శ్యామ్ ప్ర‌సాద్‌

ఫోరం ఫ‌ర్ గుడ్ గ‌వ‌ర్నెన్స్ మెంబ‌ర్‌